Ang pagpamusil nahitabo alas 9 pasado ang takna sa miaging gabii sa barangay Dalingding, Daanbantayan.
Ang biktima mao si Elesio Villaester, 41, nagpuyo sa maong dapit.
Ang nagpusil sa biktima mao ang wala mailhing lalaki nga nagsul-ob og jacket nga itom ug kasarangan lamang ang pamarog ug hingkod ang panuigon.
Ang asawa sa biktima nga si Juliet Villaester nga nakakita atol sa maong hitabo naglisod usab sa paghulagway sa mamumuno.
Si PO1 Dario Coyoca sa kapolisan sa nahisgotang lungsod miingon nga ang biktima kuyog sa iyang asawa ug upat ka gagmay pa nilang mga anak.
Matud pa ni PO1 Coyoca nga gikan sa panimalay sa iyang igsoon ang biktima ug iyang pamilya sa dihang giatngan sa mga mamumuno.
Samtang naglakaw sa ngitngit nga bahin sa maong dapit ang wala mailhing lalaki kalit lang namusil sa biktima hangtod nga namatay.
Nakabaton og samad pinusilan sa dughan ang biktima ug uban pang bahin sa iyang kalawasan ug namatay. Nanghambog maayong mo-boksing giluba nuon Ni Romeo T. Limpangog
Usa ka lalaki nga nangandak nga maayo sa boksing gidunggab sa gikainom niini sa miaging gabii sa sitio Sampaguita, Looc, Mandaue ug namatay.
Ang biktima mao si Edgardo Tamayo, 37, ulitawo ug ang nagdunggab mao si Christopher Mecaydar, 20, pulos ulitawo ug managsilingan sa maong dapit.
Si PO1 Ronnel Ramirez sa Homicide Section sa kapolisan sa maong dakbayan nga gikahinabi sa Banat News miingon nga ang duha pulos na hubog.
Matud pa niya nga dihang gitug-an sa biktima nga walay makalupig niini sa sinumbagay ang suspetsado kalit nanunggab sa giluklok nga kutsilyo.
Nakabaton og samad dinunggaban sa dughan ug dali unta nga gidala sa tambalanan ang biktima apan nakabsan kini sa gininhawa.
Dugang pa ni PO1 Himalaygan nga gitubag ang maong alarma ni PO3 Manolito Abellanosa ug nadakpan si Mecaydar sa panimalay niini.
Si PO1 Himalaygan miingon ang kasong murder ilang ipasaka batok sa suspetsado nga nabalhog na karon sa bilanggoan.