Bombero napilde's sukmagay mipusil sa boxer

Usa ka bombero nakapusil sa kanhi boksidor human malupig sa sinukmagay sa miaging gabii sa dalan Zamora, barangay Centro, Mandaue.

Ang suspetsado mao si SFO1 Romeo Veleganio, 43, minyo nga lumad nga taga lungsod sa Bantayan ug sakop sa Bureau of Fire Protection (BFP) sa maong dakbayan.

Ang napusilan mao si Erwin Amistad Ceniza, 40 anyos, ulitawo nga nagpuyo usab sa nahisgotang dapit.

Grabeng bun-og ang naangkon sa kalawasan ni Veleganio ug samad pinusilan sa bukton usab ang naangkon sa biktima nga maoy hinungdan nga dali silang gidala sa Mandaue City District Hospital.

Si Inspector Nicandro Seno, officer on duty sa Mandaue City Police Office (MCP0) ug mga sakop niini ang dali usab nga nakatubag sa maong alarma.

Nadakpan nila ang suspetsado ug nasakmit usab nila ang armas nga kalibre 45 nga nagdala sa serial number 0405182456 nga may tulo ka kabhang ug lima ka buhing bala.

Sa nasayran sa Banat News sa taho sa kapolisan nga gikalalis ni SFO1 Veleganio ang usa ka traysikol drayber nga gikasugat niini sa maong dapit nga 'no entry'.

Dihang nakabiya na sa maong dapit ang traysikol drayber kalit lamang gipukpok og kusog sa miduol nga mga estambay ang luyong bahin sa taksi nga gimaneho ni Veleganio.

Gikasuko kini ni Veleganio ug mipailang bombero apan si Ceniza ug ang kuyog niining mga lalaki nasuko usab ug nahitabo ang sinukmagay.

Ang laing bombero nga si Steve Veloso nga sakay ni Veleganio ang nagdali pagkanaug sa taksi ug mipakgang unta niini.

Apan wala panumbalinga sa maong mga lalaki sa pagtuong pasahero lamang kini ni Veleganio nga nangilad sa pagpailang sakop sa bombero.

Si SFO4 Joe Laureto sa BFP sa maong dakbayan nga gikahinabi sa Banat News miingon nga kuyog ni SF01 Veleganio si Veloso sa pagpalit unta og init nga pan sa bakery.

Matud pa niya nga si Mandaue City Fire Marshall Oscar Mayol mimando na sa paghimog pakisusi alang sa pagsuta sa maong insidente.