Mandaue - Jones PUJ nahilis na — Citom

Nagkahilis na gyud ang mga PUJ gikan sa Mandaue- Jones nga rota nga padayong namasahero lahos sa Osmeña Boulevard ug Colon area dinhi sa dakbayan sa Sugbo.

Tungod kini sa walay hunong nga pagpanakop sa mga sakop sa Citom may labot sa pagpadayon sa implementasyon sa City Ordinance 1837 nga nag-ban sa mga PUJ gawas sa siyudad sa Sugbo sama sa Mandaue nga makapamasahero dinhi sa dakbayan.

Apan giklaro ni Citom Executive Officer Arnel Tancinco nga gikan sa alas 8:00 sa buntag hangtud sa alas 5:00 sa hapon ang oras nga gimando niya sa mga traffic enforcer pagpanakop sa mga PUJ unit sa Mandaue nga molahos dinhi sa dakbayan.

Giklaro ni Tancinco nga wala na siyay gitugotan nga mga sakop sa Citom nga manakop panahon sa gabii ilabi na sa mga adlaw nga Sabado ug Domingo tungod kay wala na silay extra time nga gihatag sa mga kawani.

Gikonpirmar ni Tancinco ang pagnihit na karon sa mga PUJ unit sa Mandaue nga padayong nagkawatkawat sa pagpamasahero dinhi sa dakbayan.

Gani niadtong milabay'ng semana dunay 14 ka mga unit sa Mandaue Jones nga rota ang ilang nadakpan ug na-impound gumikan sa paglapas sa nahisgutang ordinansa.