Gilataya'g trak patay

Patay ang usa ka lalaki human kini madagit sa ten wheeler truck nga nagkarga og graba nga paingon sa dakbayan sa Sugbo. niadtong Biyernes sa national road sa barangay Media 11 sa dakbayan sa Toledo.

Ang biktima mao si Jupiter Aldemaro, 29 anyos, ulitawo nga nagpuyo sa maong dapit.

Gimaneho ni Carlito Pantonial, 32 anyos, minyo nga taga Bato sa dakbayan sa Toledo ang maong sakyanan nga nakaligis sa biktima.

Ang suspetsado nga gikahinabi sa Banat News miingon nga layo pa nakita na niya nga nagbarog ang biktima sa daplin sa karsada.

Sa paglabay niya sa gibarogan sa biktima nahingangha na lamang siya nga napasok kini sa ilawom sa trak.

Dali unta niyang gitabang ang biktima apan tungod sa grabeng kadaut nga naangkon nakabsan gayod kini sa iyang gininhawa.

Si SPO1 Anaclito Young sa traffic section sa kapolisan sa maong dakbayan nga maoy nakatubag sa maong alarma midetinir karon sa suspetsado human usab sa pagtahan niini.