CCPO gidayeg sa AGI

Edipisyong gihimong opisina sa Cebu City Police Office giisip nga "fire hazard," mga polis di magkadimao ang grammar, kakulang sa mga sakyanan, dagko og bills, walay back-up generators, dunay mga polis nga di maka-memorya sa Miranda Doctrine kun katungod sa usa ka akusado, naghinobrang pagkaagresibo sa mga "aktor" sa usa ka senaryong gipahimo kanila ug uban pa.

Kini maoy nakita sa mga sakop sa inspection team atol sa Annual General Inspection nga natapos niadtong adlaw'ng Huwebes nga angayang ayuhon sa CCPO aron mas mapanindot pa ang ilang serbisyo sa publiko.

Apan bisan sa maong mga kakulangon gidayeg gihapon ang CCPO tungod sa epektibo niining kampanya batok sa mga wanted criminals nga 85 porsiyentong nangadakpan, pakigsandurot sa komunidad.

Gidayeg usab ang maayong relasyon sa CCPO ngadto sa lokal nga kagamhanan ug pribadong sektor, updated sa camp defense plans, reward system, maayong pagkabutang sa mga importanteng rekords, maayong koordinasyon sa barangay intelligence networks, updated nga listahan sa pinangita sa balaod ug uban pa.

Hinuon sa kinatibuk-an nakita sa AGI inspectors nga milambo ang CCPO kumparar sa miaging tuig diha sa ilang operasyon ug serbisyo ngadto sa publiko.

Matud pa sa mga inspectors nga ang dakong suporta sa lokal nga kagamhanan ug mga opisyales niini maoy nakapalambo sa CCPO hinungdan nga maisip kining de-kalibre ug may kalidad sa ilang trabaho.