Mahuyang gipusil sa tulisan

Usa ka mahuyang nga Muslim gipusil human kini tulisa sa duha ka tawo ug nadala ang balor P60 mil nga kantidad sa alahas didto sa Sitio Rosas, Looc, Lapu-Lapu sa milabay'ng gabii.

Ang biktima mao si Cairudin Sabarat, 34, ulitawo ug nagpuyo sa dalan Ompad, Poblacion, Lapu-Lapu usa ka mahuyang nga beautician.

Base sa pasiunang imbestigasyon nga gihimo ni SPO1 Andres Gahi sa Theft and Robbery Section (TRS) sa dakbayan sa Lapu-Lapu nasayran nga samtang si Sabarat naglakaw sa dalan sa maong dapit kuyog ang mga higala niining mahuyang kalit kini nga giatngan sa duha ka tawo.

Sa dihang kalit nga gilabni ang bag ni Sabarat iya kining nagunitan hinungdan sa ilang pagnilayogay sa suspetsado, apan wala makabantay si Sabarat nga ang kauban niini mibunot og usa ka wala mailhing kalibre sa armas dayong pusil ngadto kaniya.

Si Sabarat nga nahiagum og samad pinusilan sa iyang bukobuko dali kining gidala sa Lapu-Lapu District Hospital ug gibalhin ngadto sa Vicente Sotto Memorial Medical Center gumikan kay nag-ungot pa ang bala sa iyang bukobuko ug gipaubos sa operasyon.

Samtang ang usa sa mga suspetsado nailhan sa kauban ni Sabarat nga si George Retiza diin hugot nga mitumbok kang Dennis Tangub nga taga Looc, Lapu-Lapu nga maoy usa sa responsable sa pagpusil ni Sabarat sa milabay'ng gabii.

Nadala sa mga tulisan mao ang usa ka bag nga adunay sulod nga P5 mil ug balor P55 mil sa nagkadaiyang matang sa alahas sulod sa bag sa biktima.