Sa gihimong follow-up sa kapolisan sa Lapu-Lapu nasayran nga ang namatay mao si Carlos Cuizon Salatandol, 17, ulitawo, nagpuyo sa Sitio New Lipata, Pusok, Lapu-Lapu ug usa ka miyembro sa Beta Gamma Rho.
Matud pa ni PO3 Manolito Abellanosa, igsuon niini ug ang iyaan sa biktima positibong mikonpirmar nga si Salatandol ang napusilan patay agi sa usa ka saag nga bala nga miigo sa dughan sa biktima.
Kahinumduman, usa ka negosyanteng Muslim nga si Oscar Sampurna gipusil patay sa laing negosyanteng Muslim nga si Lumanog human kini nagkabangi kalabot sa ilang negosyo.
Sa dihang gipusil ni Lumanog si Sampurna naigo kini sa dughan tumong sa kasingkasing niini ug sa dihang milapos ang bala sa wala pa mahibaw-ing armas didto kini miigo sa dughan usab ni Salatandol hinungdan sa ilang kamatayon.
Hangtod ning pagbalita, padayon pa gihapon ang gihimong follow-up sa kapolisan sa Lapu-Lapu alang sa kasulbaran sa maong kaso ug pagtaral sa responsable sa kamatayon sa duha ka tawo sa milabay'ng Domingo.