Mga polis way armas gikinahanglan sa Cebu

Mga polis nga dili magdala og armas nga mahigalaon ug matinahuron sa katawhan mao ang labing gikinahanglan nga ipakatap sa kadalanan.

Matud ni Mayor Thadeo Ouano sa dakbayan sa Mandaue nga ang batuta, pito, posas ug handheld radio maoy angay nga pagadad-on sa maong matang sa mga polis nga idistino sa kadalanan sa pagpakita sa katawhan nga malinawon ang dakbayan.

Si Ouano nga nakig-atubang sa 96 ka bag-ong mga polis nga gidestino sa Police Regional Office (PRO-7) ang miingon nga wala magkinahanglan og tag-as nga kalibre sa armas ang pagbantay sa kahapsay ug kalinaw.

Gipasabot niya nga ang mga polis nga sama sa Special Weapon and Tactic (SWAT) sa kapolisan maoy gikinahanglan nga kompletohan sa mga kahimanan.

Naglakip niini ang armas, handheld radio, sakyanan ug uban pa nga ilang magamit sa pagtubag sa alarma batok sa pundok sa mga terorista ug uban pang kriminal.

Sumala pa niya nga ang SWAT usa ka espesyal nga yunit sa kapolisan nga adunay igong katakus sa pagtubag sa mga alarma batok sa mga banggiitang kriminal.

Dugang pa ni Ouano nga ang pagpakita sa mga polis sa kadalanan nga dili magdala og armas ang makakabig kini sa mga langyaw nga kapitalista sa pagbutang sa ilang negosyo sanglit gimatuod man niini ang kamalinawon.