Arkitek sa CICC 'mopusta'

Nanghagad og P500,000 nga pusta si Architect Manual Guanzon nga mahuman gyud ang Cebu International Convention Center karong Nobiyembre 15.

Nahimong emosyonal ang 888 Media Forum kagahapon diin gituki ang isyu sa CICC.

Napikal si Guanzon sa kanunay'ng pagtumaw sa pangutana nga gikan mismo sa mga Sugbuanon kon mahuman ba gyud ang CICC sa dili pa ang Asean Summit.

Kini ang hinungdan nga gisanglitanan ni Guanzon nga walay mahimong presidente sa nasud nga Sugbuanon sanglit ang Sugbuanon mismo ang dili mobotar.

Laing gisanglitanan ni Guanzon ang dili pagkahinayun sa iyang pagpapili isip presidente sa kahugpungan sa mga architect lukop nasud human ang iya kaubanang Sugbuanon mismo ang miingon nga dili mobotar kaniya.

Matud pa ni Guanzon nga mahimo na nga karon ipabuhat ang mga imbitasyon sa inauguration sa CICC.

Daghang proyekto si Guanzon sa Sugbo diin gipangutana usab siya sa mga tag-iya kon mahuman ba gyud sa gikatakdang petsa.

Matud pa ni Guanzon nga kon wala niya pakyasa ang mga pribadong establisamento sa tukmang petsa sa paghuman sa proyekto, walay rason nga iyang pakyason ang CICC sanglit dili mahimong ioktaba ang Asean Summit.