10 ka sakop sa imigrasyon gikiha'g libelo ni Castro

Napulo ka mga tinugyanan sa Bureau of Immigration ang gikiha og kasong libelo ni Prosecutor Mary Ann Castro ngadto sa buhatan sa Cebu City Prosecutor's Office.

Ang gipasakaan mao si Atty. Leobarlo Enad, hepe sa Board of Special Inquiry sa BID-7, Marciano Lucido, Gemma Torres, Dilausan Montor, Melanie Ouano nga mga immigration officers, Alice Laurente, Alfred Suico, Rowena Patalinghug nga mga confidential agents, Ramon Guzman, intelligence officer nga nadestino sa Dumaguete ug Ramon Ugarte, ang civil security guard 1.

Base sa gipadala nga fax message sa buhatan ni BID-7 Regional Director Geronimo Rosas, 10 sa iyang mga empleyado mag-atubang og kasong libelo. Si Castro nagpirma niini nga pinetsahan Agosto 18, 2006 dungan usab sa iyang pagkatangtang sa iyang serbisyo sa buhatan sa BID-7 nunot sa mando gikan ni Justice Secretary Raul Gonzales.

Ang gipadala ni Castro mao lamang ang cover letter sa iyang pagpasaka og kasong libelo batok sa 10 ka personnel sa BID-7 ug wala malakip ang affidavit complaint niini.

Gihulagway ni Dir. Rosas nga harrasment ngadto sa iyang mga tawo ang gihimo ni Castro ug nganong wala siya mahiapil sa maong kaso.

Usa sa gidudahan sa 10 ka mga empleyado sa BID-7 nga gumikan sa ilang gipasakang petisyon ngadto kang Gonzales nga ipa-recall ang mando niini sa pag-detail ni Castro sa maong buhatan.

Si Atty. Serafin Abellon, legal officer sa BID-7 nga nahinabi sa Banat News mipadayag nga ilang gisaysay tanang mga illegal operation ni Castro sa maong buhatan, ang dili maayong relasyon niini ngadto sa mga empleyado ug ang paghimo og mga lakang nga walay kasayuran ang ilang labaw nga si Rosas.

Ang maong petisyon gipirmahan kini sa 70 ka mga empleyado sa BID-7 gikan sa ilang uluhang buhatan sa Mandaue hangtod na sa mga BID personnel nga madestino sa Mactan Cebu International Airport.

Matud pa ni Abellon nga ang gihimo sa mga empleyado batok ni Castro usa lamang ka legal nga paagi sa paghangyo kang Gonzales nga pahawaon sa iyang buhatan si Castro ug kun kini dili dawaton ni Gonzales wala silay mahimo.

Hinuon, ang 10 ka mga empleyado nga gipasakaan og libelo ni Castro andam kini mga moatubang kaniya sa hukmanan gumikan kay wala silay nakitang sayop sa ilang hangyo nga palagputon si Castro sa buhatan sa BID-7.