Hustisya sa nahagbong

Nataligam-an sa nagbukal nga kontrobersiya sa pagpahunong sa pagpapanumpa sa 17,000 ka tinun-an nga nakapasar sa gikahadlokang gitikas nga nursing board exam niadtong Hunyo ning tuiga ang mayoriya sa mga nikuha sa pasulit-58%, ang labing taas sa niaging dekada-nga nahagbong sa pasulit. Ang 25,000 nga wa kapasar di kapasanginlan nga nakapahimus sa leakage nga gipagawas pila ka adlaw sa wa pang pasulit. Kay kon nakadawat pa, sila untay topnotchers, di mga iwit.

Gawas lang kon mga bugo na gyod kaayo ang mga kanahan nga naglibog na hinuon tungod sa leakage. Lisod hinuon ning tuohan kay apil sa nahagbong mao man ang mga sinaligan sa mga eskuylahan nga niawhag sa hukmanan pagpahunong sa oath-taking. O ba kaha gipanggabaan lang sa ilang kabuang. Apan mas lisod nang pamatud-an sa buwag nga mga imbestigasyon sa Professional Regulation Commission (PRC), National Bureau of Investigation (NBI) NBI ug sa Kongreso.

* * *

Sunod buwan pa husayon sa Court of Appeals (CA) ang mga petisyon nga nag-awhag sa hingpit nga pagbasura sa sangpotanan sa pasulit. Di kaha maayo nga gikan karon hangtod unya hinayhinayan sa PRC pagpasabot ang mosunod nga duha ka pangutana labot sa mga nangahagbong?:

• Sa pagtangtang sa PRC sa 90 ka pangutana sa Test III ug 20 ka pangutana sa Test V-kay nitakdo sa leakage nga napamatud-an sa pasiuna nilang imbestigasyon-giapil ba nila sa pagtuki ang posibleng negatibong epekto ini ngadto sa mga wa kakuha sa leakage, nga mas luwas nga tuohan nga mao ang kinabag-an?; ug

• Ang pagdalidali sa PRC pagpapanumpa sa 42% nga nakapasar sa pasulit wa ba kaha makapasamot sa inhustisya sa kinabag-an nga mahimong nangahagbong lang kay wa na apila pag-ihap ang sakto nilang mga tubag sa 110 ka mga pangutana sa Test III ug V?

* * *

Ang labing makiangayon untang kasulbaran sa krisis nga namugna sa leakage sa nursing board exam, labi na atubangan sa nagkahilis nga kahigayonan nga makatrabaho sa sud ug sa gawas sa nasud bisan ang kapin sa 2,000 nga nakapanumpa na sa wa pa kaluwati ang temporary restraining order (TRO) sa CA, mao ang pagsubli sa pasulit nga way gasto ang mga tinun-an-wa na hinuoy paagi nga mabawi ang dako na kaayong kalangay sa mga gradwado nga naghikay nang daan sa ilang mga dokumento pagpanarbaho sa US ug ubang kanasuran.

Apan ang pagbasura sa pasulit, samtang di makiangayon sa minoriya nga nakapasar sa labing ligdong ug matarung nga paagi, makapatigbabaw sa katungod ug kadungganan sa mayoriya nga mahimong nahagbong tungod kay-gawas nga wa silang kalili sa leakage-maoy nabundakan sa tangkugo sa pagbasura sa mga pangutana nga, samtang nitakdo sa leakage, posibleng mao ra sab untay ilang dag-anan sa pagpasar.

* * *

Email: leo_lastimosa@abs-cbn.com