Proteksyon sa mga sakop sa media

Gipanghingusgan sa konseho sa mga peryodista sa Sugbo nga makasuporta sa pagpalabang sa duha ka mga balaodnon nga naa na sa senado nga magprotiher sa mga tigbalita sa nasud gikan sa pagpanghulga og pagpanghasi.

Kini sa dihang ang Cebu Citizens Press Council (CCPC) misaad nga molihok kini pinaagi sa pagpadalag mga suwat sa mga senador nga mohangyo unta nga dili nila babagan ang mga balaodnon nga mao ang House Bill (HB) no. 4835 ug 77, nga pulos gipangamahanan ni Kongresista Raul del Mar sa ubos balay balaoranan.

Si CCPC acting executive director Pachico A. Seares nagkanayon nga ang maong mga balaodnon pulos gipasiugdahan sa mga opisyal sa CCPC hangtod nga sa pagpangamahan ni Kongresista del Mar nakapasar na kini sa ikatulo ug katapusang pagbasa sa Kongreso ug giduso na ngadto sa Senado.

Ang HB 4635 nag-amendar sa "Sotto Law" nga naghatag lamang og kagawasnon sa mga peryodista sa pamantalaan sa dili pagbutyag sa tawong tinubdan sa usa ka kontrobersiyal nga balita gawas kon gikinahanglan gyud sa korte, ug ning maong balaodnon gilakip na sa kagawasnon ang mga magsisibya sa radyo ug telebisyon.

Samtang ang HB 77 naglimite kini sa mga isang-at nga mga kasong libelo batok sa mga peryodista diha lamang sa lugar diin naa magbase ang buhatan sa publikasyon ug estasyon sa sibyaanan.

Ang kahasol sa mga respondente sa kasong libelo nasinatian ning tigbalita dihang usa sa mga kasong libelo nga atong giatubang niadtong diha pa ta sa pamantalaang The FREEMAN didto isang-at sa kihante sa Tagbilaran City, Bohol ug duna pay didto sa Manila sa kasong libelo nato sa pagkamagsisibya sa radyo.

Hinuon gituohan ni Seares nga pinaagi sa ilang paningkamot nga giduyogan usab sa Philippine Press Council (PPC) nagtuo siya nga aprobahan sa mga senador kining maong mga balaodnon.