Usa na niini ang Cebu Federation of Informal Settlers, Sidewalk Vendors and Transport Associations Cooperative.
Gibutyag sa tsirman niini, Edward Ligas, nga duna sila'y 10,000 ka sakong bugas nga anaa sa National Food Authority nga ipabaligya sa tag P900 ang matag sako.
Apan matud pa ni Ligas nga dili mahalin ang maong bugas sanglit walay mopalit nga retailers.
Gipadayag ni Ligas nga maayo nalang unta nga makaganansiya ang ilang kooperatiba apan gumikan sa pagbaha sa smuggled nga bugas maglisud gyud sila pagbaligya niini.
Gitumbok ni Ligas nga dunay mga opisyal sa Bureau of Customs nga nagpaluyo sa rice smuggling sa Sugbo.
Nisamot karon ang kabalaka sa grupo ni Ligas nunot sa taho nga dunay smuggled rice nga anaa karon sa pantalan sa Sugbo nga moabot sa 300,000 ka sako diin gilambigit niini si Cebu Customs District Collector Ricardo Belmonte kinsa dali usab nga nihimakak sa pasangil.
Matud pa ni Belmonte nga gipugngan na sa Bureau of Customs ang barkong MV Maas Trader sanglit nagpaabot pa sila sa import entry una pa madiskarga ang sinakong bugas.
Mismo si Customs Commissioner Napoleon Morales ang niluwat na og Customs Memorandum Circular nga legal ang maong kargamento ubos sa Philippine International Trading Corporation.
Gikataho nga kooperatiba nga gipanag-iya og politiko sa Maguindanao ug Cotabato ang consignees sa maong kargamento apan sa Sugbo mopabaha og bugas.
Nunot niini nanawagan si Ligas sa BOC ug sa Cooperative Development Authority sa pagsusi kon legal ba ang maong kooperatiba.
Luwan sa nahisgutang barko nga nidunggo sa Sugbo ang 413 ka container vans nga bugas nga moabot sa 15,000 metriko tonilada.
Sayo niini, mga text messages nga giingong gikan sa Grain Retailers Confederation of Cebu ang nangreklamo sa kahadlok nga makasulod sa merkado ang mga smuggled nga bugas.