Talisay LTO mihimakak sa pasangil

Gihimakak sa hepe sa Land Transportation Office sa Talisay Bernardo Borromeo Jr. ang kabahin sa pasangil nga ang iyang buhatan nagtago og pre-signed nga emission test result.

Ang buhatan sa LTO gipasanginlang namaligya sa maong emission test result sa kantidad nga P650.00.

Si Borromeo mihagit sa mga tawo nga mikwestiyon karon sa iyang pagpamuno sa LTO sa Talisay nga mopahigayon og imbestigasyon sa matag transaksiyo nga gipahigayon diha sa iyang buhatan.

Bag-o lang usa ka concern citizen ang mipadala og suwat ngadto ni Konsehal Alan Bucao kinsa mipasangil nga si Borromeo namakak sa iyang mga gipanulti dihang gikuhaan kini og pamahayag sa mga sakop sa media sa milabay'ng semana kabahin sa mga pasangil nga dunay nahitabong binuang diha sa iyang buhatan.

Ang maong concerned citizen mipasangil kang Borromeo nga adunay gitagoang pre-signed smoke emission test results nga pirmahan uban sa technical description nga marehistro ang sakyanan isip public utility vehicle and/or private owned motor vehicles.

Ang maong suwat gipadangat niadtong Hulyo 28 niining tuiga.

Kahinumduman nga si Borromeo mihimakak sa mga pasangil ni Bucao nga mahimong walay kapuslanan ang laing emission testing center nga tukoron diha sa siyudad tungod kay ang LTO wala na magkinahanglan og emission testing certificates kung ang tag-iya sa usa ka sakyanan makahatag og P300.00.

Gitataw ni Borromeo nga kinahanglang adunay nalakip nga emission testing certificate ang dokumento sa mga sakyanan nga magparehistro pag-usab tungod kay pwede siyang mapasakaan og kasong kalapasan sa "clean air act" ug dili maka-isyu sa maong certificate ang iyang buhatan tungod kay dili parehas ang ilang computer print outs sa emission test center.