Kolektor giapil sa rice smuggling

Gihimakak ni Cebu Customs District Collector Ricardo Belmonte ang pasangil nga iya ang usa ka barko nga pinalusot nga bugas nga midunggo sa pantalan sa Sugbo.

Matud pa ni Belmonte nga gipugngan na sa Bureau of Customs ang barkong MV Maas Trader sanglit nagpaabot pa lang sila nga maduso ang mga dokumento aron mabayran ang tukmang buhis sa maong kargamento.

Gikonpirmar ni Belmonte nga 413 ka container vans ang luwan sa maong barko diin may sulod kini nga 440 ka sakong bugas ang average matag van.

Gibutyag ni Belmonte nga base sa manifesto nga ila na nga nakuha, 92 ka vans nga kompirmadong bugas ang sulod samtang 19 ang asukar ug ang uban niini sagol-sagol na nga kargamento.

"Mas maganda kung smuggled 'to dahil pinabayad namin na taxes," nagkanayon si Belmonte.

Gani gipahibalo ni Belmonte ang ilang ulohang buhatan aron malikayan ang mga pagduda ilabi na nga mikatap ang mga text messages nga naglambigit kaniya sa maong kargamento.

Base sa taho nga ang pinalusot nga bugas gideklarar kini nga beans, construction materials ug uban pa.

Sumala sa mga text messages, ang Grain Retailers Confederation of Cebu nga gipangulohan sa presidente niining si Teresa Alegado ug Erwin Gok-ong ang nangreklamo sa kahadlok nga makasulod sa merkado ang mga smuggled nga bugas.