Tau Gamma nga suspek sa murder nasikop sa CIIB

Usa ka sakop sa Tau Gamma Phi nga gipasanginlang suspek sa pagpatay niadtong tuig 2005 nadakpan kagahapon sa udto sa mga sakop sa Criminal Investigation and Intelligence Branch sa Kinasang-an-Pardo ning dakbayan.

Si Dino Arresgado,28, gitumbok nga kauban ni Ericsson Pastorfide kinsa usa usab ka Tau Gamma Phi dihang gipatay si Janel Anthony Espinosa niadtong hapon sa Hulyo 4,2006 diha sa luyong bahin sa Southwestern University sa dalan AB Aznar, Sambag Uno ning dakbayan.

Ang grupo ni PO2 Mariano Aluba sa CIIB armado sa warrant of arrest nga giisyu ni RTC Branch 19 Judge Ramon Codilla miadto sa balay ni Arresgado human makadawat og impormasyon sa presensya niini.

Si Arresgado sa pakighinabi sa Banat News kusganong mihimakak sa pasangil matud pa niya nga wala na siya magpuyo diha sa Sambag Uno dihang nahitabo ang pasangil ug bag-uhay palang siya nakabalik dinhi tungod kay nagtrabaho siya sa Baguio city.

Dihang gipangutana kung nganong wala siya motahan dayon dihang gipagawas ni Mayor Tomas ang listahan sa mga pinangitang fratman dinhi sa Sugbo diin usa siya niini, matud pa niya wala siya masayod nga duna siya'y kaso ug nadunggan lang niya ang maong balita sa mga kaubanan.

"Wala man koy kalibutan ana, unsaon man pagsurender nga wala man gani ko kabalo nga naa koy kaso," asoy pang Arresgado.

Gibasol niya ang media nga maoy nagbutang-butang og pasangil kaniya, apan gipanghimakak kini sa mga tigbalita kagahapon tungod kay ang mga kasayuran sa hitabo naggikan sa mga imbestigador sa kapolisan.

Miangkon hinuon siyang siya maoy presidente sa Tau Gamma Phi sa Sambag Uno chapter niadtong tuig 2002 hangtud sa 2003 apan sukad niadto wala na siya moaktibo sa grupo.

Midugang si Arresgado nga makalusot siya sa maong kaso apan miangkong maglisod siya sa pagprubar niini ug madugay pa sanglit ang kasong murder walay piyansa.