Si Jayvee Miag-ao, nga taga Cansaga, Consolacion kinsa maoy nakapusil nila ni SPO1 Reynaldo Matillano ug PO3 David Enterina sa CIDG7 niadtong Hunyo 27 gikatahong nasamdan usab dihang nakabawos og pabuto ang duha ka mga polis.
Ang CIDG7 nangita kang Miag-ao sa tanang tambalanan sa lalawigan apan pakyas. Dunay nadawat nga report ang kapolisan nga nadangat sa Danao District Hospital sa Miag-ao ug patay na kini apan dihang gisusi wala siya didto.
Si Matillano nga gikahinabi sa Banat News kagahapon nagkanayon nga duha ka adlaw gikan sa paggawas nilang duha ni Enterina sa Chong Hua Hospital mihimo og imbestigasyon sa maong kaso.
Nahibaw-an nalang ni Matillano gikan sa doktor nga miopera kaniya nga si Miag-ao gioperahan usab niini nianang Hunyo 28 sa alas 4 sa kaadlawon tungod sa samad pinusilan diha sa iyang sampot.
Si Miag-ao gikatahong nangalyas sa pangalang Marvin Murillo nga taga Dapdap, lungsod sa Liloan nga kalit lang gipareglahan sa mga batan-on ug gipusil.
Sa pagsusi sa Banat News sa Homicide Section sa Cebu City Police Office nasuta nga dunay Marvin Murillo nga napusilan niadtong kaadlawon sa Hunyo 28, miangkon kining sakop sa Tau Gamma Phi ug gikan pa mibisita sa iyang uyab luwan sa usa ka motor dihang kalit gipusil og tulo ka batan-on diha sa Lorega-San Miguel.
Nianang pagkahapon migawas si Miag-ao alyas Marvin Murillo sa Chong Hua Hospital bisan wala itugot sa doktor, matud pang Matillano nga posibleng nakamatikod kining diha usab sila gidala sa maong tambalanan.
Samtang gipanghimakak sa team leader sa CIDG nga nakapatay kang Miag-ao didto sa Balabagon, Moalboal nga ilang gi-salvage si Miag-ao.
Matud pa ni Chief Inspector Fermin Armendares nga si Miag-ao ang unang mipusil kanila, gani gigukod pa nila kini dihang naigo na makausa aron unta dakpon apan dihang nakorner mibunot kini og granada hinungdan nga ila kining giusban og pusil.
Samtang midugang si Armendares nga walay iregularidad sa paggamit nila sa narekober nga kinarnap nga Isuzu Highlander nga may plakang WAK-965 nga nabuslot pagpusil ni Miag-ao, tungod kay duna kini pagtugot sa insurance company nga mao nay tag-iya niini nga ilang gamiton sa operasyon.