GINANG NAPAIG SA SUNOG

Usa ka 67-anyos nga babaye ang napaig atol sa sunog sa Sitio Maharlika, Tipolo, Mandaue, tupad sa Palace of Justice kagahapon sa buntag.

Si Necesaria "Charing" Caray, minyo ug nagpuyo sa maong dapit, gituohang adunay deperensiya sa pangisip, gikatahong natanggong atol sa sunog nga miugdaw og 20 ka balay.

Base sa imbestigasyon ni Mandaue City Fire Marshal Chief Insp. Oscar Mayol ug SFO1 Roy Garcia nasuta nga didto magsugod ang sunog sa lawak nga giukopahan ni Anita Elorde sa panimalay ni Gregoria Casia.

Si Elorde wala diha atol sa hitabo tungod kay nangumpra kini sa Carbon market ug gumikan kay mga 'light materials' ang mga kasikbit nga panimalay sa maong lugar, dali kaayong mikatap ang kalayo.

Si Mayol nagkanayon nga si Caray wala makagawas sa iyang pinuy-anan sa dihang dali kaayo nga mikatap ang kalayo hinungdan sa iyang pagkapaig.

Base sa mga residente, ang magtiayong Cerilo ug Charing Caray wala kini anak ug anaa pa gyud sa dili maayong pangisip si Charing hinungdan nga usahay siradohan kini sa iyang bana kun molakaw alang sa pagpangita og panginabuhian gumikan kay molakaw si Charing nga walay direksyon.

Apan si SFO1 Garcia mipadayag nga sa iyang nakita nga sitwasyon ni Caray sa dihang naugkat na kini, nasuta nga anaa na kini sa gawas sa iyang panimalay apan posibleng naabtan lang gihapon sa kalayo gumikan sa kahinay na niini nga molakaw gumikan sa iyang pangidaron.

Atol sa maong sunog, si FO2 Ramon Bathan nahiagum og first degree burn sa iyang tuong bukton human kini mipakgang sa pag-ulbo sa kalayo ug natumbahan sa nagbaga nga sin.

Ang maong sunog nadawat sa kabomberohan sa Mandaue alas 8:30 kagahapon sa buntag ug gipaubos kini sa general alarm ug nakontrolar kini mga 15 minutos. Gibanabana nga moabot ngadto sa P650 mil ang inisyal nga danyos sa maong sunog.

Si Kapitan Jesus Neri Sr. sa Guizo mipadayag nga bisan pa nga wala pay pormal nga pagdeklarar nga iya nang mga sakop ang mga nasunogan sa Tipolo, iya gihapon kining tabangan ug pangitaan og paagi nga mahatagan og temporaryong kapasilungan. Young pahawaon gyud sa Unit 2 Ni Darrel Carumba

Himuon sa mga opisyal sa kagamhanan sa siyudad sa Sugbo ang kutob sa ilang mahimo aron gyud mopahawa ang Young Builders Construction pag-ukopar niini diha sa Unit-II Carbon Market.

Ang pagpabilin sa maong kontraktor sa nahisgutang lugar mao kiniy nakalangay pagsugod sa P200 milyones nga rampa nga tukoron sa siyudad sa Carbon Area.

Gipadayag ni City Administrator Francisco Fernandez nga milapas na ang 10 ka adlaw nga tagal nga ilang gihatag sa Young Builders aron mopahawa sa lugar.

Apan pabiling nagmagahi pagbiya ang Young Builders gumikan sa giinsister niini nga pag-claim sa nahabiling kobrahonon nila sa siyudad may labot sa pagtrabaho nila sa wala mahuman nga katukoran og balik sa Unit-II Carbon Market.

Gipadayag ni Fernandez nga hingusgan gyud nila ang pagpapahawa sa maong kontraktor diha sa maong lugar gumikan kay nabayran na kini og P22 milyones sa siyudad.

Tungod sa nasinating kalangay tinguha ni Fernandez nga maningil og damages ingon man ipakanselar pa gyud niini ang business permit sa Young Builders dinhi sa dakbayan.

Si Mayor Tomas Osmeña sa iyang bahin, nanganti nga mohimo og legal nga lakang batok sa Young Builders apan dili na interesado pa ang mayor nga modemanda og damages tungod kay importante alang niya nga mobiya na kini sa lugar.

Ang WT Construction maoy nakadaug nga kontraktor sa rampa nga pagatukoron diha sa Carbon Area. - Darrel A. Carumba