Gas boy napatay, tulis wa madayon

Patay ang usa ka gas boy human napusilan atol sa pagpanulis nga nahitabo sa usa ka gasolinahan didto sa Sitio Looc, Maribago, Lapu-Lapu sa milabay'ng hapon.

Ang namatay mao si Juno Visitacion Ortega, 21, ulitawo nga lumad sa Sitio Catang-catang, Paman-angan, Bais, Negros Oriental ug kasamtangan nagpuyo sa naasoy'ng lugar.

Ang kauban ni Ortega ug Ruffy dela Peña Gomonit, 22, ulitawo nga lumad sa Bayugan 1, Agusan del Sur ug kasamtangan nagpuyo sa Dumsat, Pagsabungan, Mandaue nasamdan human gibukbok sa usa sa mga tulisan.

Nagtrabaho ang duha isip gas boy sa Shell station nga mahimutang sa Sitio Looc, Maribago nga gipanag-iya sa usa ka Mike Lorenzo Villa.

Base sa imbestigasyon ni PO3 Manolito Abellanosa sa Homicide Section ug PO1 Jude Marifosque sa Theft and Robbery section, nasayran nga mga alas 5:45 sa milabay'ng hapon tulo ka tawo ang luwan sa usa ka motorsiklo ug nagpakaaron-ingnon nga magpa-gasolina.

Si Gomonit nga maoy miatiman sa maong bag-ong naabot nga kustomer kalit kining gitionan sa armas nga mobuto ug gideklarahan nga "tulis" hinungdan nga iya giilogan og armas ang usa ka tulisan ug nahitabo ang nilayogay.

Sa maong pagnilayogay kalit nga mibuto ang armas sa tulisan ug naigo si Ortega nga diha sa duol atol sa maong panghitabo ug sa dihang usa ka kauban sa tulisan ang mibukbok sa tangkugo ni Gomonit nahagba kini. Iyang nakita si Gomonit nga nagkadugo.

Human sa maong hitabo dali kaayong nakasibat ang tulo ka tulisan luwan sa usa ka motorsiklo samtang si Ortega nga samaran sa iyang walang kilid sa ubos nga bahin sa ilok dali kining gidala sa tambalanan apan gideklarar kining wala nay kinabuhi sa mga mananambal.

Samtang si Gomonit nahiagom lamang og mga bun-og sa kalawasan bunga sa iyang pagsukol sa mga tulisan.

Hinuon, ang mga tulisan pakyas sa pagtulis sa maong gasolinahan ug padayon usab nga gihimo ang imbestigasyon sa kapolisan sa maong insidente ug pag-ila sa mga tulisan.

Samtang si Villa nga tag-iya sa maong gasolinahan mipadayag sa iyang pagtabang sa galastuhan sa kamatayon ni Ortega gumikan kay nakalas kini nunot sa iyang trabaho.