MJ's sa publikong luna

Mga marijuana anha ipananom sa mga luna nga gipanag-iya sa gobiyerno ilabi na sa mga dapit nga lisod taakon sa mga tawo ug kapolisan sumala pa sa opisyal sa Service Security Group.

Si Supt. Mariano Natuel ang hepe sa SSG mibutyag sa Banat News nga sagad sa mga marijuana nga ilang madakpan ug maibot anha gyud sa mga hilit nga dapit sa kabukiran.

Kagahapon sa buntag ang grupo ni Natuel misaka sa sitio Batalyon sa bukirong barangay sa Tabunan human makadawat og impormasyon nga dunay nakit-ang mga punoan sa marijuana sa maong dapit.

Tuod man nakuha sa kapolisan ang 114 ka punoan sa hamtong na nga mga marijuana ug ang tulo ka mga sudlanan sa tubig nga maoy gamiton sa mga nananom sa pagpamisbis.

" Usually itanom nila in public land, kadtong mga bakilid nga lugar," asoy pang Natuel.

Walay nadakpan ang kapolisan atol sa maong ronda sanglit walay bisan usa ka balay nga nakit-an diha duol sa maong lugar nga gitamnan niini.

Ang marijuana motubo lang sa mga lugar nga bugnaw ang temperatura sama sa bukirong barangay sa Sugbo, Balamban ug Barili nga karon maoy sagad nga dunay masakpang plantasyon sa maong iligal nga tanom.