Bro. Soc wa matandog sa line-up ni Leyson sa Talisay

Wala matarog si Mayor Socrates Fernandez sa mga hulgang politikanhon ni Konsehal Gabriel Leyson sa Cebu City kinsa mipahibawo nga hapit na makompleto ang iyang line-up para sa election sa 2007.

Matud pa ni Fernandez nga katungod kini ni Leyson ug isip usa ka banggiitang politiko dili na siya mahibulong sa mga labok sa umaabot niyang kaatbang karong sunod tuig.

Si Fernandez miingon nga sa natad sa pamolitika way laing hari kundili ang katawhan nga mohatag og hukom kinsay padag-on nila sa adlaw sa piniliay.

Alang kaniya nasayod na ang taga Talisay giunsa sila pagdagmal sa kagamhanan sa Cebu City diin mahisakop sa Leyson sama sa mga gihinginlang mga lab-asira sa Pasil. Buhi usab nga saksi kadtong pipila ka opisyal ug kawani sa Citom nga kumo taga Talisay, gipapha usab sa mayor sa dakbayan sa Sugbo.

Nasayod usab ang taga Talisay nga may naggiya kang Leyson pagdala sa rinda sa panggobyerno sa Talisay aron nga mohilom ang kasamtangang liderato sa pagbawi sa 153 ektaryas nga luna sa dakbayan nga gikaon sa South Reclamation Project (SRP).

Sa laktod ang taga Talisay nasayod na unsay hinungdan nga naa mokandidato si Leyson sa ilang lugar ug nagtuo usab siya nga dili malimot ang Talisaynon sa pagpaningkamot niya ug ni Kongresista Eduardo Gullas nga protihian ang katungod niini batok sa gustong moyatak, matud pa ni Fernandez.