Kini maoy gitinguha ni Mayor Tomas Osmeña human gibulgar ni kanhi Konsehal Joy Augustus Young, consultant on education sa City Hall ang halapad nga cheating sa tanang mga tinun-an sa publikong tunghaan.
Sukwahi kang Young dili buot ang mayor nga i-anunsyo pa sa publiko ang maong nadiskubrihan nila nga pagpanikas sa milabay'ng NAT exam nga gikunsabohan sa mga prinsipal ug mga magtutudlo.
Una nang gibulgar ni Young nga sa resulta lang sa NAT exam dinhi sa dakbayan ang mga tunghaan gikan sa bukirang bahin ug ang mga Night High School maoy nakasulod sa top 20 gikan sa 43 ka mga publikong tunghaan sa sekundarya dinhi sa dakbayan.
Ang mga tunghaan nga nakasulod sa top 20 mao ang Cebu City National Science High School, Inayawan Night High School, Punta Princesa Night School, Dr. Emilio Osmeña High School, Guba High School, Agsungot High School, Mambaling Night High, Cambinocot High School, Babag, Mabini, Tisa Night High, Adlaon High School, Abellana Day and Night High, Toong Night High, Zapatera Night School, Binaliw High School, Tejero Night High, Bulacao Night, Paril High School ug Pardo Day and Night High School.
Gipasabot ni Young nga lisud katuohan nga ang mga tunghaan sa bukirang bahin ug ang mga Night High School maoy mangharos sa NAT exam gumikan kay ang mga magtutudlo sa bukid kanunay lang mag-ilis ilis og bag-ong mga maestra nga bag-o lang nadawat gumikan kay ang karaan mobalhin man sa urban area.
Samtang ang mga night high school nakabintaha usab kini kay ma-una man nila og eksamin ang mga tinun-an sa adlaw ug pag-abot sa ilang torno pagka-gabii duna nay mogawas nga mga kodigo.
Gisaway ni Osmeña ang maong sistema karun nga gisagop sa Department of Education diin mag-iyahay og paningkamot ang mga prinsipal ug magtutudlo nga makakuha og kodigo aron makapasar ang kadaghanan sa ilang mga tinun-an aron dili basulon ang ilang performance.