Magtiayon nangompra marijuana nasikop

Nasikop atol sa checkpoint sa kapolisan sa Balamban ang managtiayon sakay sa habalhabal gikan nga nangompra og marijuana sa Bayong, bukirang barangay sa Balamban.

Gipahigayon ang checkpoint sa miaging adlaw alas 3 pasado ang takna sa hapon didto sa Sitio Kuroskuros, sakop sa Bayong ning lungsod.

Ang nasikop nga magtiayong Allan, 36, ug Jimmylour, 35, mga residente sa Inayawan ning dakbayan.

Nakuha sa ilang posisyon mao ang duha ka kilo kapin nga pinaugang dahon sa marijuana

Nangulo sa checkpoint mao si SPO2 Jude Dennis Aguanta ug mga kaubanan pulos nadestino sa Balamban Police Station

Matud pa sa report nga ang kapolisan nakadawat og impormasyon sa miaging semana gikan sa mga sakop sa Barangay Intelligence Network diha sa nahisgutang barangay.

Daling naghimo og checkpoint ang mga polis nga miresulta sa pagkasikop sa magtiayong Ocarisa.

Si PO2 Hannibal Larida sa pakighinabi sa Banat News miingon ang duha sakay sa habalhabal dunay dalang sako gikan sa Bayong.

Sa dihang ilang gipahunong ang drayber sa habalhabal nga gisakyan sa magtiayong Ocarisa ug gihiling ang bag sa mga polis nakit-an ang dakong putos sa dahon sa saging ug gisulod sa plastik nga dunay sulod nga dahon sa marijuana.

Matud ni PO2 Larida ilang nasayran nga matag semana kining mopalit og marijuana diha sa maong lugar ug posibling anha ra usab ibaligya sa Inayawan.