Ex-convict gibirahan sa traysikad

Usa ka ex-convict gipusil patay samtang nagmaneho og traysikad diha sa dalan A. Lopez extension sa Lower Bonbonan, Labangon ning dakbayan kagahapon sa udto.

Ang biktima giilang si Malvin Labrado,hingkod ang panuigon ug residente sa Upper Bonbonan sa nahisgutang lugar kinsa gikatahong gikan na sa Bagong Buhay Rehabilitation Center tungod sa drugas.

Sumala pa sa usa ka 8 anyos nga batang lalaki nga gikahinabi sa Banat News kagahapon tulo ka wala mailhing lalaki ang iyang nakit-ang nagpasilong sa usa ka punoan sa kahoy duol sa sam-ang sa nahisgutang dalan.

Ang biktima kinsa naghatud og pasaherong iyang pag-umangkon nga si Renel Uliamot kalit nga gibabagan sa mga suspek ug ang usa diha sa luyo maoy kalit nga mipusil sa luyong bahin sa ulo sa biktima makausa ka higayon.

Diha na mahandos sa daplin sa karsada ang bisekleta sa biktima kinsa naglingkod pa gihapon apan nagdung-aw na sa manibela.

Ang kapuyo sa biktima nga si Nancy Zapra sa pakighinabi mibutyag nga nakadungog siyang dunay gikalalis nga mga batan-ong lalaki ang biktima niadtong Lunes apan wala niya masayri kun si kinsa ang maong mga lalaki.

Sumala pa sa imbestigasyon nila ni PO3 Henry Estoy sa Homicide Section ang biktima nabilanggo sa BBRC.

Si JO1 Catherine Cintos sa BBRC mibutyag nga dunay nabilanggong Marvin ug dili Malvin Labrado nga taga dalan A.Lopez niadtong Pebrero tuig 2002 ug nakagawas lang niadtong 2003, ang kaso niini tungod sa iligal nga drugas.

Ang ubang mga nakasaksi nagkanayon nga upat ka tawo ang nakit-ang mibabag sa agianan sa biktima ug ang usa niini diha sa luyo maoy kalit nga mipusil sa ulo niini.

Human sa pagpamusil ang tulo ka back-up miikyas padulong sa Upper Bonbonan samtang ang gunman yanong milakaw padulong sa Lower Bonbonan, ang upat pulos walay maskara apan nagsuot ang uban og shorts ug kolor pulang t-shirt.

Usa ka tanod nga si Agustin Zapra nga gikahinabi sa mga tigbalita kagahapon nagkanayon nga sukad nga nakagawas sa bilanggoan si Labrado 'nagbait' na kini ug nanginabuhi nalang sa pagmaneho og traysikad.