Jonkie O., sunod nga mayor

Hingpit na gayod nga gibutyag ni Mayor Thadeo Ouano nga ang kamanghurang anak niining lalaki nga si Jovito "Jonkie" maoy mahimong sunod nga mayor sa dakbayan sa Mandaue.

Ang pagbutyag ni Ouano iyang gihimo atubangan sa iyang mga dumadapig ug mga bisita atol sa kasaulogan sa adlaw nga natawhan niini niadtong miaging Domingo sa gabii.

Ika 60 ka tuig niyang adlaw nga natawhan mao usab ang katapusang kasaulogan nga mayor sa dakbayan sumala pa niini.

Gumikan niini si Ouano mipasalamat sa tanang nagsuporta sa iyang pagpangatungdanan isip mayor sa dakbayan nga maoy nakatabang sa kalamboan sa dakbayan.

Naglakip sa iyang gipasalamatan mao ang iyang pamilya, mga dumadapig, mga magpapatigayon ug mga higala nga maoy naghatag kaniyag kalig-on bisan sa unos nga mikusokuso sa iyang administrasyon.

Gipasalamatan usab ni Ouano si Gobernador Gwendolyn Garcia sa pagpaluyo sa kalamboan sa dakbayan nga maoy hinungdan sa walay kausabang hukom sa pagpabarog sa Cebu International Convention Center sa luna nga gipanag-iya sa kagamhanan sa dakbayan.

Si Mayor Ouano nga mipadayag sa iyang pagritero sa politika human sa iyang termino ang nagplano usab nga magpapili nga kongresista sa ika unom nga distrito karong 2007 eleksiyon.