Indian patay sa disgrasya's motor

Namatay gayod ang tigpatanto nga usa ka Indian national human ang motorsiklo nga giluwanan nasungag ngadto sa traysikol nga de pasaheroan.

Nahitabo ang aksidente sa National Road sa Cawangcad, Madredejos, alas 3 pasado ang takna sa miaging kaadlawon.

Ang biktima mao si Jimmy Singh, 32, ulitawo, temporaryong nagpuyo sa barangay Malbago, Madridejos, sa nahisgotang lungsod.

Ang gikasungag mao ang traysikol nga gidala ni Dominador Aresgado Escaran, 31, minyo nga taga Talanghanan sa nahisgotang lungsod.

Si PO2 Gabriel Villagano sa kapolisan sa nahisgotang lungsod nga gikahinabi sa Banat News miingon nga nagdagan subay sa nahisgotang dalan ang motorsiklo nga giluwanan ni Singh.

Matud pa niya nga sa paghidangat gayod sa kurbadahong bahin sa maong dapit ang traysikol nga gidala ni Escaran kalit lang nasungag sa motorsiklo ni Singh.

Si P02 Villagano miingon nga gumikan sa kusog kaayong impact sa maong panagsungag ang biktima nga nalagpot ug napantok ang ulo sa sementong karsada.

Dali nga gidala ang biktima sa district hospital sa maong lungsod apan gideklarar kini sa mga doktor sa maong tambalanan nga patay nang nahidangat kaniya.