P10M gibalibaran sa Malacañang

Mibalibad ang Malacañang sa gipangayo nga P10 milyones nga gahin sa kagamhanan sa dakbayan sa Sugbo aron maoy gamiton sa gastuhan pagpa-renovate sa karaang Gotiaco building nga nahimutang atbang sa annex building sa City Hall aron maoy kaabtan sa mga sakop sa Presidential Security Group (PSG) atol sa upat ka adlaw nga Asean Summit nga ipahigayon dinhi sa Sugbo karung bulan sa Disyembre.

Gibutyag ni City Information Officer Nagiel Bañacia nga gibalibaran sa Malacañang ang maong hangyo gumikan kay wala nay igong pundo nga magamit alang sa maong katuyoan.

Nasayran nga ang siyudad sa Sugbo mao untay mogasto alang sa himuong pagpa-renovate niini apan na-atol nga nahutdan na usab kini sa gahin.

Kini tungod kay milapas naman ngadto sa P34 milyones ang standby fund niini nga moabot og P20 milyones nga alang sa gastuhan sa mga pagpangandam nga himuon sa Asean Summit.

Matud ni Bañacia nga gikasabutan nila ni Mayor Tomas Osmeña nga adto na lang sa buhatan sa Population Commission (POPCOM) ug buhatan sa DECS sa may Banilad paabton ang mga sakop sa PSG nga motabang pagpalig-on sa seguridad atol sa Asean Summit.

Apan gibutyag ni Bañacia nga ipadayon gihapon unya ang pag-renovate sa maong Gotiaco building aron mao kini giplanohan nga himuong buhatan sa Cremdec aron butangan unya og canteen alang sa mga kawani sa City Hall.

Samtang nagpadayon na ning higayona ang pag-repair sa condominium unit sa dakbayan nga maoy pa-abtan sa 15 mil ka mga polis ug sundawo nga motabang pagpatunhay sa kahusay ug kalinaw sa maong kalihukan.