Dalagita igo's bala sa Tau

Saag nga bala nakaigo og usa ka dalagita atol sa pagpamusil sa usa ka miyembro sa Tau Gamma Phi didto sa Maslog, Danao sa milabay'ng gabii.

Ang biktima mao si Michelle Damayo Aguilar, 15, nagpuyo sa Sitio Tabok, sa naasoy'ng barangay.

Base sa pasiunang imbestigasyon ni SPO1 Rodrigo Roble sa Danao Police Station nasayran nga kuyog sa iyang mga higala si Aguilar nga nagbarog sa maong dapit sa dihang tulo ka tawo nga luwan sa usa ka motor mikalit og hunong sa ilang atubangan dayong pamusil ngadto kanila.

Gumikan kay walay igong direksiyon ang pagpamusil sa nag-angkas sa maong motor, si Aguilar maoy naigo sa saag nga bala.

Tungod sa samad pinusilan nga nahiaguman ni Aguilar sa iyang tuong abaga sa likod kini gidala sa Danao District Hospital ug gibalhin sa Vicente Sotto Memorial Medical Center.

Hinuon, luwas na sa makuyaw'ng kahimtang si Aguilar, samtang ang tulo ka wala mailhing tawo nga namusil dali kaayo nga nakapahilayo sa maong dapit atol sa pagresponde sa mga sakop sa kapolisan.

Base sa nakuhang impormasyon sa Banat News sa dapit nga nahitabuan, ang tulo ka mga tawo nga namusil mga sakop sa Tau Gamma Phi ug ang kauban unta ni Aguilar ang tuyo niini gumikan kay sakop kini sa Alpha Kappa Rho apan ang biktima maoy naigo.