3 ka Crips gisikop

Tulo ka giingong sakop sa Crips Gang ang gidakop sa Pardo Police Station human ang usa kanila nakit-ang naghupot og armas apan ang armadong suspek gikatahong misukol pa og sukmagay sa mga polis samtang laing duha pa ka mga kauban niini ang gidakop usab kagahapon sa kaadlawon.

Ang mga suspek giilang sila si Richie Alferez alyas Erap,22; Fritz Bacalso,26, ug George Zapanta pulos mga residente sa Inayawan ning dakbayan.

Si Alferez maoy gitumbok ni Chief Inspector Alexis Relado nga nalambigit sa mga sunod-sunod nga pagpanulis diha sa maong barangay ug sa hurisdiksyon sa Pardo Police Station.

Matud pang Relado nga dunay pending nga mga kasong pagpangawat si Alferez lakip na niini ang kasong pagpatay sa usa ka miyembro sa ribal nga grupong Bloods gang pila na ka bulan ang milabay.

Ang grupo ni SPO3 Sanrico Jolijole, PO3 Joel sanchez ug PO3 Herminiano Seares Jr. miresponde sa maong lugar human dunay residente ang mitug-an kabahin sa usa ka armadong tawo nga nag-estambay diha duol sa kapilya sa Inayawan.

Tuod man naabtan si Alferez nga naghupot og usa ka kalibre 357 rebolber nga dunay lima ka buhing bala apan wala mga dokumentos nga napakita, laing nasakmit kaniya mao ang usa ka paketeng may sulod nga gidudahang shabu.

Atol sa pagdakop gikatahong misukol si Alferez ug nakigsukmagay sa mga polis hinungdan nga nabun-og usab kini, apan dihang posasan na kini ang duha niini ka mga kaubang sila si Zapanta ug Bacalso gikatahong mibitad kang Alferez palayo sa mga polis.

Apan ang duha gidakop usab og sa pagrekisa gikatahong nakakuha ang mga polis og duha ka paketeng shabu ug gamit sa pagsuyop gikan kanila.