Midaug sa beauty pageant gipusil-patay

Namatay gyod ang usa sa mga kandidata alang sa kuwartahay'ng beauty pageant sa barangay atol sa gikatakda niining kasaulogan sa tinuig nga pangilin sa sunod semana dihang kalit lang nga gipusil human sa gihimong eskotinyo sa mga balota.

Nahitabo kini alas 12 pasado ang takna sa miaging tungang gabii sa basketball court sa Magtagobtob, bukirang barangay sa Danao nga nahimutang sa 30 ka kilometro gikan sa Poblacion.

Ang biktima mao si Irish Monte Bakang, 18, lumad nga taga Lawa-an, Danao ug usa sa mga kandidata alang sa Miss Magtagobtob 2006 sa maong dapit.

Si SPO1 Jose Relampagos sa Danao Police Station nga gikahinabi sa Banat News miingon nga sa pakisusi maoy ilang nasayran nga dihang nahuman na ang eskutinyo sa balota kalit lang nasinati ang brownout.

Atol sa brownout kalit lang milanog ang boto sa armas ug nakasinggit sa kasakit ang biktima nga nakabaton og samad pinusilan sa ubos nga bahin sa hawak.

Matud pa ni SPO1 Relampagos nga ang biktima kinsa maoy labing daghan og nakuhang boto sa eskutinyo nga gihimo ang gideklarar sa komitiba sa piyesta nga maoy migawas nga mananaug.

Dihang moatubang na unta ang chairman human sa iniphanay nga ilang gihimo kalit lang napawong ang sugang dagitab.

Nakasinggit sa kasakit ang biktima human maigo sa maong pagpamusil ug dali kining gidala sa tabalanan.

Sumala pa ni SPO1 Relampagos nga ang biktima nga unang gidala sa Danao District Hospital gidali pagbalhin sa Vicente Sotto Memorial Medical Center sa dakbayan sa Sugbo apan nabugtoan gayod kini sa iyang gininhawa.