Dry-run sa summit gihimo

Ang ASEAN Business Advisory Council (ABAC) meeting dinhi sa Sugbo giisip nga dry-run sa mga opisyales sa Bureau of Immigration and Deportation (BID-7) alang sa nagsingabot nga ASEAN Summit sa Disyembre.

Si BID-7 Regional Director Geronimo Rosas nga nahinabi sa Banat News miingon nga si BID Commissioner Alipio Fernandez miabot dinhi sa Sugbo sa milabay'ng bulan aron sa pagpakigkita sa iyang mga sakop dinhi sa rehiyon.

Si Fernandez namahayag nga himuon ang tanang paagi nga mahapsay ang pag-abot sa mga delegado sa ABAC diin kini magsilbing dry-run sa umaabot nga summit.

Ang BID-7 subsob karon sa ilang pag-atiman sa mga delegado nga unang miabot dinhi sa Sugbo naidtong Agosto 9 gikan sa ilang pag-agi sa immigration counter sa Mactan Cebu International Airport arrival section hangtod na sa hotel.

Matud pa ni Rosas nga usa sa ilang main concern mao ang pagsusi sa status sa mga delegado aron dili kini malutsan sa mga langyaw nga buot mosabotahe sa maong panagtigum.

Hinuon wala mabalaka ang mga opisyal sa BID-7 gumikan sa ilang koordinasyon sa mga airline companies nga mosumiter og advance nga manifesto hinungdan nga hapsay ang pag-abot sa mga langyaw ug walay gikatahong problemang nasinati sa BID-7 ug sa mga delegado.

Ang ABAC nga gihimo sa Shangri-la Mactan Hotel matapos karong Agosto 16 ug adunay laing international nga panagtigum karong bulan sa Septembre diin naglangkob sa 11 ngadto sa 17 ka nasud ang moapil niini.