Kalunasan dili luwas sa dengue

Dili pa hingpit nga luwas ang mga residente sa Kalunasan, dakbayan sa Sugbo sa sakit nga dengue.

Gani, ang Cebu City Health Department ug mga barangay opisyal sa Kalunasan padayon sa ilang kampanya sa pagpanglimpyo ug paghimo og fogging operations tungod sa pagkamatay sa upat ka bata tungod sa dengue.

Sukad sa Mayo ning tuiga hangtod karong buwana, miabot ngadto sa 36 ka bata ang naigo sa sakit nga dengue sa maong barangay.

Sa maong barangay, nakasinati og problema ang mga health workers ilabi na sa pagpasabot sa katawhan sa pagtiner og ligid sa ilang panimalay.

Sa miaging adlaw, nagkinahanglan pa manawag og taga Crime Suspension Unit sa Cebu City Police Office ang mga health workers aron makuha ang mga ligid sa panimalay ni Vicencio Garcia diha sa Sitio unit 3A sa Kalunasan.

Giawhag sa makadaghang higayon si Garcia nga kuhaon ang ligid tungod sa pagtuong kini maoy puy-an ug itlogan sa mga lamok nga nagdala sa sakit nga dengue.

Mipasabot si Rosaminda Lauron, ang midwife sa barangay Kalunasan, nga napugos sila sa pagpatawag og police assistance tungod sa una nilang anha sa panimalay ni Garcia, gidad-an sila og pinuti ug mipugong kanila nga kuhaon ang mga ligid.

"Gahi gyud kaayo na siya mao magpa-assist na lang mi sa polis," matud ni Lauron.

Tuod man nakuha ang mga ligid human sa pag-abot sa mga polis. Ang Kalunasan maoy gihatagan og pagtagad sa City Health Department tungod sa kadaghan sa mga bata nga nataptan og dengue.

Base sa talaan sa health center sa Kalunasan sa tuig 2005, dunay 26 ang nataptan og dengue apan walay namatay nga bata. Lahi sa tuig 2006 nga niabot og 36 ang na-report apan dunay upat ka mga bata ang namatay.

"Usa sa problema namo mao ang ulahi nga pagdala sa mga inahan sa ilang mga bata ngadto sa ospital, usahay mokompyansa ra gyud sila. Kun magduda sila nga dunay dengue, dili na paaboton ang tulo ka adlaw, ila unta idala ngadto sa ospital," matud ni Lauron.

Ulahing natakboyan mao ang 2-anyos nga anak lalaki ni Emelin Masbate nga nadala sa ospital niadtong Domingo human kini natakboyan sa dengue.

Labing minos pito ka sitio ang adunay kaso sa mga dengue, kini mao ang sitios unit 3, 3-a, unit 4, unit 5, Camp Marina, Crisanto Heights ug unit 1. Ang walay na-rekord nga dengue mao ang unit 2 ug Sobtia.