Migratory birds sa Mactan gikabalaka

Nagpabiling hulga sa Sugbo karon ang mga langyaw'ng langgam sa Lapu-Lapu City gumikan sa sakit nga "bird flu" nga misiaw sa kasikbit nga mga nasud sa Pilipinas sa Asia.

Matud pa ni Dr. Pablo Balite, regional quarantine officer sa Central Visayas nga kasagaran sa mga langgam nga motugpa diha sa Olango Island sa Lapu-Lapu "overstaying" na busa peligro kaayo kun makadala kinig virus sa bird flu nga gikan sa Vietnam, Indonesia ug uban pang nasud sa Asia, makapanakod gyud sa kadugay nila mobiya.

Nasayran nga gikabalak-an sa United Nations nga anha sa Indonesia ang may dakong kalagmitang manukad ang usa ka"pandemic" nga kaso sa bird flu, matud pa ni Balite.

Kun hisgotan ang pandemic, buot ipasabot nga tibook kalibutan nga mokaylap ang maong sakit nga gikan sa langgam nga motakod ngadto sa mga tawo, diin 70 porsiyento nga mamatay ang matakdan ug 30 porsiyento rang kahigayonan nga kini mabuhi.

Maoy hinungdan nga matud pa ni Balite, gipabantayan pag-ayo sa iyang buhatan ang mga tugpahanan sa eroplano ug dunggoanan sa barko sulod sa 24 oras matag adlaw.

Kini aron pagsiguro nga gikan sa mga buhi nga hayop ug karne na, mapanid-an nila pag-ayo, aron nga way makaintrang sakit sa bird flu dinhi sa rehiyon.