Nadat-uga'g paril, patay

Patay ang usa ka mekanikong lalaki human kini mapusdaki og kongkretong paril diha sa dalan Saint Jude Thadeous sa Mabolo ning dakbayan samtang ang biktima natulog niadtong Sabado sa udto.

Giila sa kapolisan ang biktima mao si Vic Basubas, 40, ulitawo ug residente sa nahisgutang lugar kinsa nakaangkon og daghang grabeng kadaut sa iyang lawas.

Sumala pa sa mekaniko usab nga igsuon sa biktima nga si Joseph Basubas ngadto ni SPO3 Alex Dacua sa Homicide Section kasamtangan silang nagpaabot sa ilang kustomer diha sa maong dapit niadtong tungora.

Samtang nagpaabot mitagpilaw una og katulog si Basubas diha sa ibabaw sa usa ka lantay nga kawayan tupad sa kongkretong paril.

Apan dangtan pila ka minutos kalit nga nahagsa ngadto sa iyang manghod ang maong paril nga nakaingon sa pagkahugmak sa gikatulgan niini.

Si Joseph daling nagpakitabang sa mga silingan kinsa daling miukay sa mga napulpog nga paril ug giugkat si Basubas ug gidali og dala ngadto sa Cebu City Medical Center apan gideklarar kining dead on arrival.

Ang biktima nakaangkon og daghang kadaut sa kalawasan nga gituohang maoy nakaingon sa hinanali niining kamatayon.

Niadtong adlawa kusog kaayo ang paghangin ug panagsang pag-ulan nga maoy gituohang nakaingon sa paghumok sa pundasyon sa maong paril, ang hangin maoy gidudahang mitukmod sa paril ngadto sa pagkahagsa niini.