Anti-Chacha sa Cebu gipakusgan

Gilusad sa nagkalainlaing sektor ang ilang kusganong kampanya aron batukan ang pagpamugos sa administrasyon ni Presidente Gloria Arroyo nga ma-amendar ang Konstitusyon pinaagi sa Charter change (Cha-cha).

Ang Alternative Law Groups Incorporated nga kwalisyon sa 18 ka mga legal resource, non government organizations maoy mangusog sa pagpasabot sa katawhan kun unsay matuod nga tumong sa gipasiugdahan nga Cha-cha sa gobiyerno.

Ang maong kwalisyon gilangkuban kini sa sektor sa mga kabus, mananagat, mag-uuma, kababayen-an ug kabataan.

Gipadayag ni Atty. Raul Barbarona, executive director sa Environmental Legal Assistance (ELAC) atol sa press conference kagahapong adlawa sa Baseline restaurant nga dili makasulbad sa mga nasinating kalisdanan ug uban pang dagkung problema sa nasud ang gitinguha nga Cha-cha sa gobiyerno.

Ilang gituohan nga magtukmod lang kini aron mabanhaw og balik ang nalumpag na nga milabay'ng diktadoriyang Marcos sa higayon nga molampos gyud ang gitinguha nga pag-usab sa Konstitusyon.

Gipasabot ni Barbarona nga pagkakaron dili pa gyud unta angay nga usbon ang Konstitusyon aron mahibaw-an kun unsay matuod sa mga mitumaw nga isyu ug kontrobersiya batok sa kasamtangang administrasyon.

Apan kun sa higayon nga maamendar ang konstitusyon pabor ang maong grupo nga ipaagi kini sa constitutional convention kon Concon ug dili sa Cha-cha.

Human sa maong launching mipasalig ang maong grupo nga himuon nila ang kutob sa ilang mahimo aron mahatagan og dugang kasayuran sa tinuoray nga tumong ang katawhan may labot ning giduso nga Chacha nga alang nila usa ka pagpangabuso sa gahum sa posisyon.