Diving spots mapuslan atol sa summit sa Asean

Usa sa mga dapit nga suroyanan sa mga turista ilabi na sa umaabot ASEAN Summit, dinhi sa Sugbo mipasigarbo pag-ayo sa kadaghan nilag "diving spots" aron dugokan sa mga delegado sa dakong tigom karong Disyembre.

Si Mayor Inocentes Cabaron sa lungsod sa Moalboal labi pang mipasibantog karon sa ilang 13 ka mga sawmanan nga maoy paborito kaayo sa mga turista.

Kini way labot sa ilang 36 ka mga "beach resorts" ug dul-ang 1,000 ka mga lawak o para sa hotel accommodations.

Ang municipal planning development officer sa Moalboal nga si Asuncion Pelmitos nagkanayon nga duruha ka mga lugar ang naglangkob sa matahom nga kaligoanan sa Moalboal nga mao ang White Beach sa barangay Saavedra ug Panagsama beach sa Bas Diot.

Ang ilang mga diving spot anaa sa maong mga lugar nga maoy nakapakombinse sa daghan kaayong mga turista nga gikan sa America, Uropa, Japan, China, Germany ug daghan pa.

Gani matud pa ni Pelmitos nga sa nanglabay'ng katuigan duna silay gitawag nga "lean months"o mga buwan nga mingaw kaayo gikan sa Pebrero hangtod sa Agosto matag tuig.

Apan karon nabaniog na pag-ayo ang ilang mga resort ug diving spot tanang mga buwan nagdasok na ang ilang mga turista nga naghatag og dako kaayog kauswagan sa ilang ekonomiya.

Ang ilang mga lawak nga kapuy-an sa mga turista gipadaghan pag-ayo sa mga pribadong mga tag-iya niini nga kasagaran magtiayong langyaw ug Pilipino.

Bisan ang ilang mga pagkaon mihaom kaayo alang sa mga turista tungod kay kasagaran mga international foods ang ilang isilbi ngadto sa mga langyaw, agad lang kon unsay klaseng pagkaon nga naandam nila sa ilang nasud.

Maoy hinungdan nga si Cabaron mibahad nga tagbawon nila ang mga delegado sa ASEAN nga mosuroy ngadto sa Moalboal karong Disyembre.