Si Konsehal Arsenio Pacana, vice chairman sa committee on education mopalabang og resolusyon alang ning maong katuyoan human diskuntinto kini sa milabay'ng resulta sa National Achievement Test (NSAT) sa mga tinun-an dinhi sa dakbayan diin daghan ang nahagbong niini.
Tungod niini, hingusgan sa konsehal ang pag-awhag sa DepEd nga mopatuman kini og mga programa aron mapa-ubos sa subsub nga pagbansaybansay ang mga magtutudlo sa English nga subject aron hinayhinay nga mapalig-on og balik ang kalidad sa edukasyon sa mga tinun-an.
Ang dili kaayo maayo og pundasyon sa mga tinun-an sa elementarya ilabi na sa subject nga English maoy gituohan sa konsehal nga usa sa hinungdan nga mikunhod og maayo ang kalidad sa edukasyon.
Ang dili maayong pundasyon sa elementarya mao usay usa sa nakitang rason ni Pacaña nga dunay daghang mga tinun-an nga naka-gradwar na sa kolehiyo apan wala gihapon kini makasulod og trabaho gumikan sa dili nila maayo og pundasyon sa English nga maoy magamit nila isip komunikasyon sa pagpangaplay og trabaho.
Gihimong basihanan sa konsehal ang daghang mga call centers nga gibuksan dinhi sa Sugbo nga nagkinahanglan og daghang mga college graduate apan maglisud og sulod niini ang ubang mga college graduate gumikan kay dili kini maayong motabi og English ingon man makasabot kun dunay pasulit.