PRO-7 sugod na'g dawat mga aplikante

Nagsugod na og panawat ang Police Regional Office 7 og mga aplikante sa pagka-polis alang sa ikaduhang batch sa attrition recruitment quota nga sugdan karong bulana.

Moabot sa 250 ka mga aplikante ang dawaton sa kapolisan ug gimandoang pasumitihon sa ilang mga gikinahanglang dokumentos ngadto sa Regional Human Resources Development Division (RHDD) sa PRO7 karong Agosto 15.

Ang mga aplikante kinahanglang Pilipino, gradwado og upat ka tuig nga kurso, 5'4 ang height samtang 5'2 usab ang sa mga babaye ug nag-edad pa og 21 ngadto sa 30 ug wala makombikto sukad nga sukad sa korte gumikan sa krimeng nahimo.

Ang mga dokumentos anha isumitir sa Recruitment and Selection Section sa RHDD nga ibutang sa duha ka puti nga folder ug usa ka green nga folder.

Niadtong milabay'ng bulan sa Hunyo dunay 150 ka mga bag-ong polis ang gidawat diha sa PRO7 ug gikatakdang motapos sa ilang pagbansay-bansay sulod sa unom ka bulan.

Si Presidente Gloria Arroyo misaad nga morekrut og dugang 15 mil ka mga polis atol sa iyang termino aron makatabang sa pagbantay sa seguridad sa kriminalidad.