Call centers sa India manganhi

Kadaghanan sa mga call center locators sa nasud sa India nga gikatahong mamalhin sa Pilipinas ang moanhi sa Sugbo.

Kini sumala pa ni Ma. Grace Diaz, chief labor officer sa Department of Labor and Employment sa Central Visayas.

Nunot niini matud pa ni Diaz nga daghang trabaho ang nagpaabot sa Central Visayas.

Gani sa pagkakaron, matud pa ni Diaz nga nagkuwang na ang mga trabahante sa mga call centers nga kasamtangang nahimutang sa Sugbo.

Kini gumikan sa kagamay ra sa mga kwalipikado sanglit gamay ra usab ang mopasar sa basic requirement nga mao ang maayong paglitok sa iningles.

Bag-ohay lang, gikataho na usab ang pagkinahanglan sa mga call centers og mga makamaong mosulti og Espanyol.

Nunot niini, matud pa ni Diaz nga gikinahanglan na nga mohimo og lakang ang Department of Education ug ang Commission on Higher Education aron matubag ang maong demanda sa industriya.

Usa sa angayang tutukan sa mga tunghaan mao ang pagpalambo sa pagsulti ug pagpaminaw sa pinulungang English aron dali ra madawat sa trabaho.

Ang call centers maoy nag-una karon sa ka daghan og nahatag nga trabaho sa Pilipinas sumala pa sa DOLE.

Apan nakit-an sa mga call center operators ang kakuwang sa kwalipikasyon sa paglitok sa iningles sa mga gustong motrabaho nga maoy babag nga daghan usab ang dili nila madawat.