Tomas: CIDG-7 iapil sa imbestigasyon

Giawhag ni Mayor Tomas Osmeña ang Ombudsman Visayas nga apilon ang Criminal Intelligence and Detection Group (CIDG-7) sa himuon niining imbestigasyon may labot sa pasangil nga pag-interbiner ni Konsehal Gerardo Carillo sa milabay'ng pagpangronda niini batok sa usa ka tindahan nga gidudahang namaligya og mga peke nga produktong pahumot diha sa Colon area.

Atol sa press conference kagahapon sa udto nahibulong si Osmeña kun nganong si Carillo lang ang gipaubos niini sa fact-finding investigation ug walay labot ang CIDG-7.

Alang sa mayor angay usab nga apilon sa pagsusi ang mga operatiba sa CIDG-7 tungod kay dili ikalimod nga daghan usab nga mga polis ang nalambigit sa gihulagway sa mayor nga extortion business.

Gidugang ni Osmeña nga labaw nang dili ikalimod nga dunay daghang mga ahensya sa gobyerno ang nagumon sa korupsyon hinungdan nga gisugyot sa mayor nga ipatuman ang 'transparency' ilabi na sa mga pagpangronda nga himuon.

Giklaro ni Osmeña nga dili usab mahimo nga hikawan silang mga opisyal sa dakbayan nga dili mohimo og aksyon ilabi na kun dunay mga konstituwenti nga mangayo og pakitabang sa City Hall kun dunay mga pagpangronda nga himuon.

Giangkon ni Osmeña nga nakombinser siya nga dili pag-interbiner ang gihimo ni Carillo sa milabay'ng pagpangronda sa CIDG-7 batok sa Yulian Marketing human gipresentar sa konsehal ang kopya sa search warrant nga sayop ang sketch niini ug wala usab ma-apil ang tag-iya sa tindahan nga si John Sanchez nga subject niini gawas lang sa mga produktong pahumot nga gihulagway nga peke.

Si Ombudsman Visayas Director Virginia Palanca- Santiago mohimo na og fact-finding investigation sa kontrobersya ni Carillo subay sa mga migawas nga balita sa pamantalaan.