Manicurista nakuhaa'g shabu

Manicuristang babaye nga nagpayuhot og shabu nasikop atol sa pagpangronda sa kapolisan sa Danao sa milabay'ng gabii didto sa dalan Olivar, sa maong dakbayan.

Si Verla Laude Tan, 46, dalaga, nagpuyo sa maong dapit nasikop pinasikad sa search warrant nga giluwatan ni Regional Trial Court Branch 13 Judge Meindrado Paredes ug kini giimplementar ni Supt. Larson Dechino, hepe sa kapolisan sa Danao, uban sa iyang mga sakop.

Matud pa ni Supt. Dechino nga dugay na nilang gipanid-an si Tan nga nalambigit kini sa pagpayuhot og ginadiling drugas samtang nagtrabaho kini isip manicurista hinungdan sa ilang pagpaniid niini sa milabay'ng mga adlaw.

Atol sa pagpangronda nakuha sa panimalay ni Tan ang 8 ka gagmay'ng pakete sa gituhoang shabu ug salaping cash balor P2,100.

Si Tan gibilango sa Danao Police Station samtang ang mga ebidensiya gisumiter pa ngadto sa PNP Crime Laboratory alang sa pag-testing niini.