Oil spill sa Sangat susihon sa Penro

Gipasusi sa kagamhanan sa probinsiya sa Sugbo ang kabahin sa taho nga dunay nahitabong oil spill sa Trigon Shipyard sa Sangat, San Fernando nga nakaalarma sa mga mananagat.

Si Glen Baricuatro, head sa Provincial Environment Natural Resources Office (PENRO) mibutyag kagahapon sa mga tigbalita nga ang ilang buhatan nakig-ayuda na ni Isabelo "Boy" Montejo, Assistant Regional Director sa Department of Environment and Natural Resources (DENR) ug Regional Director Alan Arranguez sa Environmental Management Bureau (EMB) alang sa ilang gipahigayong imbestigasyon.

Gitataw ni Baricuatro nga ang DENR maoy dunay kapabilidad nga makadeterminar kun adunay nahitabong oil spill sa lugar ug sa gilay-on sa nahimo niining kadaot.

Apan ang PENRO wala pay nakuhang opisyal nga taho kabahin sa insidente.

Matud ni Baricuatro nga ang nakuha lang nila nga taho mao lang ang natala sa pamantalaan diin adunay usa ka ahensiya ug ang Philippine Coast Guard ang mibutyag nga dunay oil spill apan adunay usa ka tawo nga nagkanayon nga wala o dili tinuod ang maong taho.

"Ang ato lang nadawat nga report kanang naa sa pamantalaan, ang usa ka ahensiya nag-ingon nga naa, ang usa ka tawo nga tua sa ibabaw nag-ingon nga wala, unya kanang coast guard nga naa pod sa dagat miingon nga naa" ni Baricuatro pa.

Gikataho usab nga adunay oil spill sa kadagatan sa dakbayan sa Lapu-Lapu apan matud ni Baricuatro nga wala usab kini pormal pa nga taho.

Ang buhatan sa PENRO miawhag sa mga residente sa lugar nga gikatahong naapektuhan sa oil spill nga motaho sa nahisgutang buhatan o sa buhatan sa DENR aron mahatagan dayon kini og aksiyon.

Si Baricuatro midungag nga gipangayoan siya og opisyal nga taho sa buhatan sa gobernador kabahin sa maong insidente.