Bayot nga akyat bahay nahulog sa iyang gisak-an

Nakaangkon og bali sa lawas ang usa ka mahuyang nga sakop sa akyat bahay gang human kini mahulog sa balay nga iyang gisak-an sa miaging kaadlawon sa Sitio Kimba, San Roque, Talisay.

Si Guilacar Rulete, residente sa nahisgutang lugar, mitugyan sa mahuyang nga nailhang si Louie Cabuenas, 25, taga Lawaan III, Talisay ngadto sa kapolisan sa Talisay human kini nabalian sa iyang pagkahulog.

Si Cabuenas giingong kauban sa laing duha ka mahuyang sa planong pagsaka sa balay ni Rulete. Usa nila ka kauban mikatkat sa balay ni Rulete, samtang si Cabuenas ug laing kauban namalit og pan, apan pagbalik gisusi ni Cabuenas ang balay kun didto pa ang iyang kauban sa sulod.

Nasuta ni Cabuenas nga wala na iyang kauban sa sulod sa balay, mibiya siya apan mihapit sa pagkuha sa DVD player, apan nakamata na ang anak ni Rulete nga si Gerald hinungdan nga nagdalidali siya pagkanaog agi sa bintana apan walay suwerte tungod kay nahulog na hinuon siya niini ug nasikop.

Si Cabuenas nagreklamo nga naghilanat siya sulod sa selda hinungdan nga gipatambalan sa mga polis ug gidad-an og tambal sa inahan niini.

Matud ni Cabuenas nga gamiton unta nila ang halin sa ilang makuha sa ilang "rampa" sa mga kaubanan nilang mga mahuyang.