Taksi gidagit sa tulisan

Usa ka taxi driver nga sakop sa Bantay Taxi Organization sa Bantay Radyo gitulis sa tulo ka wala mailhing tawo ug pagkahuman gidala ang sakyanan palayo sa lugar.

Kini nahitabo sa miaging gabii pasado alas 7 diha sa may Vacation Hotel dalan Juana Osmeña ning dakbayan.

Ang biktima giila nga si Chiquito Andales, 21, ulitawo nagpuyo sa Sitio Lusimba, Pardo ning dakbayan nagmaneho sa Filcarmil nga may plaka nga GWF 824.

Segun sa asoy sa biktima nga misakay kaniya ang tulo ka wala mailhing tawo, usa niini babaye nga maoy milingkod sa atubangan samtang ang duha ka mga lalaki diha sa iyang luyo ug nagpahatod sa maong lugar.

Paghidangat na sa lugar kalit lang mition kaniya og armas diha sa bukobuko ug tangkugo sa wala pa matino nga kalibre ang duha ka mga lalaki dayong deklarar og tulis.

Nagpakiluoy ang biktima nga dili lang siya patyon human gikuha sa babaye ang kwarta kapin sa usa ka libo nga iyang kinitaan apan gimanduan na hinuon siya sa usa sa tulo ka tulisan nga pakanaugon sa taxi dungan sa pag-ingon nga aron dili siya patyon.

Human sa maong hitabo, si Andales nagpa-botter sa Theft and Roberry Section sa Cebu City Police Office.

Nasayran sa Banat News sa gihimong follow-up sa drayber nga giabandonar ang iyang taxi diha sa dakbayan sa Lapu-Lapu pipila ka oras human siya tulisa.