Aksidente sa Cordova; 1 patay

Usa ang patay sa panagbangga sa duha ka sakyanan didto sa Gabi, Cordova sa milabay'ng adlaw.

Ang biktima mao si Mario Nuñez, 45, ug nagpuyo sa Cogon, Cordova.

Ang Isuzu pick-up nga nakadam-ag nga maoy nakaingon sa kamatayon ni Nuñez gimaneho sa usa ka Armenio Barayoga, 23, minyo ug nagpuyo sa Banilad, Mandaue.

Matud pa ni SPO1 Laurencio Wagwag sa Cordova Police Station nasuta nga si Barayoga padulong kini sa Lapu-Lapu sa dihang iyang nasugatan si Nuñez luwan sa iyang motorsiklo pauli na sa iyang panimalay.

Si Barayoga miasoy nga sa dihang mi-overtake siya sa usa ka multicab wala mopadaplin si Nuñez hinungdan nga sila nagkasugat ug nagkabangga hinungdan sa pagkalagpot ni Nuñez sa dalan.

Gidala si Nuñez sa Mactan Doctor's Hospital ug duha ka oras ang milabay nakabsan kini sa iyang kinabuhi gumikan sa iyang nahiaguman nga bun-og ug samad sa kalawasan lakip na sa nabuak niini nga parte sa iyang ulo.

Samtang si Barayoga personal nga mitahan sa kapolisan sa Cordova alang sa pagtubag sa iyang nahimong salaod ug andam kining mosagubang sa galastuhan sa maong biktima.

Matud pa ni SPO1 Wagwag nga pasakaan si Barayoga og kasong reckless imprudence resulting to homicide ngadto sa korte.