Bodyguard ni Margot gitaktak ni Tomas

Gitangtang ni Mayor Tomas Osmeña ang usa ka polis isip bodyguard sa iyang asawa nga si Cebu City First lady Margot Osmeña human mahibaw-i nga duna kini nagpatong-patong nga pending violations sa lagda sa trapiko dinhi sa dakbayan.

Atol sa press conference kagahapon sa udto personal nga gitawagan sa mayor ang hepe sa Criminal Intelligence and Investigation Bureau (CIIB) Supt. Paul Labra alang sa pagpa-pull out kang SPO2 Avel Dinoy isip bodyguard sa iyang asawa.

Wala malipay ang mayor human mahibaw-i niini nga mihangyo si Dinoy nga papason ang iyang 385 ka pending violations sa Citom sa lagda sa trapiko.

Si Dinoy nag-operate usab kini og usa ka jeep de pasahero-an sa Mandaue- Jones nga rota.

Apan alang sa mayor dili siya ganahan nga dunay mga tawong bodyguard o ba kaha suod sa ilang pamilya nga mo-abuso ug dili na makamaong morespeto sa balaod.

Dili makadawat ang mayor sa katarungan ni Dinoy nga wala siyay kasayuran sa maong nagtipun-og nga traffic violations gumikan kay matud pa ni Dinoy ang iyang drayber maoy responsable sa maong mga kalapasan ug wala siya masayod niini.

Gipasabot sa mayor nga mas hatagan niya og importansiya ang mga tawo nga maoy nagpatuman sa hingpit sa mga lagda sa balaod kaysa mga tawong suod nila ug mo-abuso sa kahigayonan.

Si Dinoy nga mao pay nag-escort ni Margot kagahapon sa udto sa pagbisita sa City Hall nagdumili hinuon kini pagluwat og pamahayag dihang gikuhaan og reaksyon kabahin sa maong desisyon ni mayor Osmeña.