Yap gimandoan refund sa P130T

Gimanduan sa Commission on Audit ang gitangtang nga general manager sa Mactan Cebu International Airport, Retired Gen. Adelberto Yap, sa pag-refund sa kapin sa P130,000 nga iyang gikobra sa monetization sa leave credits.

Kini human nasuta nga naapil sa gibayad sa MCIAA ang iyang leave credits sa didto pa siya sa Air Transportation Office ug sa Clark International Airport Authority nga niabot ang tanan og 112 ka adlaw nga leave credits.

"The disbursement is irregular and not allowable in audit," nagkanayun ang COA report sa niaging tuig.

Gipasabot sa COA nga ang leave credits ni Yap sa ATO dili mahimong ibalhin ngadto sa MCIAA sanglit naputol ang iyang serbisyo gikan sa usa ka buhatan ngadto na sa laing buhatan.

Samtang nasuta usab nga gibayran na si Yap sa CIAC sa iyang katapusang sweldo balor og P244,743.00 diin naapil na ang terminal pay nga P220,912.00.

Wala usab nakita sa certification of leave credits gikan sa Human Resources Management Division ang leave credits balance ni Yap.

"This is unusual considering that in the application of leave credits of other MCIAA employees this data is disclosed," matud sa COA.

Nidugang ang COA nga kini nagpakita nga ang HRMD walay rekord sa leave credits ni Yap gikan sa unang buhatan nga iyang giserbisyohan.