Tau-Gamma giluba sa Akrho

Usa ka lalaki nga sakop sa Tau Gamma Phi nalandig sa tambalanan human gidunggab sa wala mailhing sakop sa managkaribal nga Alpha Khapa Rho (Akrho) sa miaging gabii diha sa Limbaga karaoke Bar, dalan Osmeña ning dakbayan.

Samad sa bukobuko ang naangkon agi sa kutsilyo ug daling gidala sa Cebu City Medical Center ang biktimang giila nga si Jejoriel Botawan, 19, nagpuyo sa Basak Pardo ning dakbayan.

Base sa imbestigasyon sa Homicide Section ni SPO2 Rey Cuyos nga ang biktima diha sa karaoke bar, kalit lang miabot ang lima ka wala mailhing mga sakop sa Akrho.

Wala magdugay nitumaw ang mainiton nga panaglalis tali sa biktima ug lima ka mga lalaki nga miresulta sa pangulata sa lima ngadto sa biktima.

Ang biktima nakahigayon sa pagdagan ug nakasakay kini og PUJ apan ang usa sa lima ka sakop sa Akrho ang midunggab sa biktima.

Human sa maong hitabo ang lima daling nakasibat palayo sa lugar ug wala na maabti sa mga polis nga mitubag sa alarma.