Maniniyot sa Danao gitulis

Dul-an sa P100 mil ang kantidad sa mga butang nga nakuha sa lima ka tulisan gikan sa ilang biktimang usa ka maniniyot sa Sitio Quarry, Looc, Danao sa milabay'ng gabii.

Ang biktima mao si Joel Flores Almerez, 36, minyo nagpuyo sa dalan F. Raluta, Poblacion, Danao.

Base sa taho ni Almerez nga personal nga mitaho sa buhatan sa kapolisan sa Danao nga samtang mikuha siya og hulagway sa palibot sa dakbayan sa Danao alang sa usa ka photo exibit sa umaabot nga kapistahan sa maong dakbayan sa Sityembre, tulo ka tawo nga nagmaskara ang miduol kaniya samtang duha ang tua sa layo isip back-up ug mition kaniya sa kalibre .38 nga armas.

Matud pa ni Almerez mideklarar og tulis ang mga suspetsado hinungdan sa iyang paghatag sa iyang mga kabtangan ngadto sa mga tulisan.



Ang nakuha gikan kang Almerez mao ang usa ka camera nga nagkantidad og P40 mil, cellphone tag P40 mil, relo ug salaping cash nga P6,300.

Human makuha ang maong mga butang yano ra kaayong misibat ang lima ka tulisan sa maong dapit, samtang si Almerez midangop sa kapolisan sa Danao.

Matud pa ni Almerez nga gibanabana nga anaa sa mga 20 ngadto sa 25-anyos ang mga pangedaron sa mga mitulis kaniya, samtang pakyas ang mga sakop sa kapolisan sa Danao sa paggukod sa mga suspetsado.