Mitimbaya pa ni Marie Regis, 34, taga Sitio Marfa, Maguikay, Mandaue ang tawong iyang gikasugat sa wala pa siya pusila.
Base sa pasiunang imbestigasyon ni SPO3 Gil Roco sa Station 4 sa Mandaue City Police Office, nasayran nga samtang nagluwan si Regis sa iyang "speed cop" nga motorsiklo pauli na unta sa ilang panimalay apan sa iyang pagliko sa Bakilid, usa ka tawo nga nagbarog sa usa ka tindahan sa barbecue ang mitimbaya ni Regis ug miingon "good evening, mam."
Human mibalos si Regis og timbaya sa maong tawo kalit kini mibunot sa iyang kalibre .45 dayong pusil ni Regis hinungdan sa iyang pagkabagnos sa dalan uban sa iyang motorsiklong gimaneho.
Si Regis nga adunay samad pinusilan sa iyang kilid ubos nga bahin sa ilok dali nga gidala sa Mandaue District Hospital ug gibalhin sa Chong Hua Hospital ug kini ipaubos sa usa ka operasyon.
Samtang ang mipusil ni Regis dali kaayong misibat sa maong dapit luwan sa motor nga naghuwat nang daan niini pipila ka metros gikan sa nahitaboan.
Atol sa hot pursuit operation sa kapolisan sa Station 4, pakyas kini sa pag-ila sa maong suspetsado.
Base sa pamahayag ni Regis, siya nagduda nga ang motibo sa maong pagpamusil mao ang lalis nga nahitabo tali niya ug sa usa ka drayber sa milabay'ng mga adlaw human kini iyang gidakop tungod sa kalapasan sa lagda sa trapiko.
Samtang si SPO3 Roco nagduda nga adunay kalambigitan sa trabaho ang nahitabo kang Regis ug padayon pa ang ilang pagsuhid hangtod nga maila ang responsable sa maong krimen.